مسرحيات حول الخادمة

الخدامة...
(مسرحية عن الهدر المدرسي موجهة لتلميذات دار الطالبة بمديونة)

(مجموعة من الأطفال متحلقين حول طاولة يراجعون دروسهم)
(مجموعة من السيدات حول مائدة الشاي)
(خادمة صغيرة تتنقل بين المجموعتين لتلبية طلباتهم)
الطفلة(1)..هادشي ما فهمت فيه والو
الطفلة(2)..زيديني عليك
الطفلة(3)..قاليك اللي مشاو للسوايع فهمو كلشي
الطفلة(1)..اش فهمو
الطفلة(4)..انا كنت في السوايع وفهمت كلشي حيث الاستاذة كتقرينا بشوية او بالواحد بالواحد
الطفلة(1)..اوا
الطفلة(4)..كتعاود لينا الدرس او كاتدير لينا الاسئلة او التمارين
الطفلة(2)..الاستاذة ديالنا هادي.
الطفلة(4)..ايه الاستاذة ديالنا.
الطفلة(3)..او علاش ما كاتديرش معانا هادشي في القسم
الطفلة(2)..مالها مسالية خصها اتحتت وتعاود على راجلها اوطفايلاتها ولينا حافضين اش كاتدير معاهم كثر من دروس التاريخ والجغرافية
الطفلة(1)..اوماتنساوش القسم كيولي سويقة ملي الاستاذات كيتجمعويبيعوويتشاراو
الطفلة(2)..جبتي شي فيطات
الطفلة(3)..لا اخيتي هاد السيمانا غاليين
الطفلة(1)..جبتي ليا الماكياج اللي وصيتك عليه
الطفلة(3)..اشمن ماكياج ياك بغيتي عاعكر اناري يا خيتي تي مالك تفايشي اللي سمع ماكياج يقول المرا صوفيا لورين ياك عالعكر كتخدميه في كاع كمارتك
(يرتفع ضحك الطفلات ويصل الى مجلس النسوة تقوم احداهن وتصرخ)
المراة(1)..توما هادي هيا لقراية
المراة(2)..خليهم عليك وقوليليا اش درتي خلصتي مول الذهب اولا مازال
المراة (1)..باش غانخلصو اللي عندي عطيت نصو للسوايع ديال بنتي لالة مريم اونصو عطيتو لبات هاديك الخدامة الصكعة اللي غادا تصطيني
المراة(2)..تي منين كتطيحي على هاد الخدامات بنات الدوار والفيلاج كاع مشاو يخدمو فلوزينات
وانتي كاتطيحي على شي نماري زوينين
المراة(1)..راني واعرا عرفتي هاد المسخوطة حادقة ومتولة ولكن باغا ادير بحال لالاها مريم
تخلينا عانخرجو وتجلس تحنش في الصبورة او المصيبة كاتقرا مزيان واللي غايقتلني وغايطعن ليا بنتي انها كاتقرا حسن منها
المراة (3)..اوا لاواه اللي تبغيه لبنيتك تبغيه لبنات الناس ويلا كانت البنت باغا تقرا علاش ما تعاونيهاش شكون عرف تاهيا تولي شي حاجة في الدوار
المراة (2)..تاتي شكون قالك باغيا تقرا
المراة(3)..اونتي سولتيها
المراة(1)..اخيتي توما تصطيتو وانا شكون يهز ليا هاد الدارلالا اخيتي حجار لقراية يشدوها علاه انا قريت وهانا لاباس عليا
المراة(3)..لاباس عليك حيت انتي مرات القايد
المراة(2)..شوفي شوفي
(تلتفت السيدات جهة الاطفال)
الخادمة ..صافي الحل ساهل تستعملي القسمة وجدول الضرب باش تخرجي المسالة وهاهي تحلات
الطفلة(1)..ولاهيلا بصح عاوديها عافاك
الطفلة (2)..ايه عافاك
الطفلة(3)..ايه عافاك راسنا ثقيل تي عفريتة
الطفلة(4)..عرفتي شرحتي لينا بحال الاستاذة اولا واقيلا اكثرمنها
الخادمة..شوفو راه العملية ساهلة الى بغينا الكمية نحسبو شحال من كيلو في كل صندوق ديال الخضرة شراه الخضار اونضربوها في شحال من صندوق ونقسمو التمن اللي شرا بيه كلشي على شحال من صندوق يخرج لينا شحال خلص في كل واحد ساهلة
المراة(1)..ونضربها لباباك انا بشي دقة ونقسم ليك الضهر باش تعرفي راك عا الخدامة او لقراية بعيدة عليك..نوضي جمعي النوضة ما حشمتيش المسخوطة
المراة(2)اودي الله يهديك اش هاد الهدرة على هي ما شي بنادم
المراة(3) ..وزيدون ما دارت زلة ياك عاكاتعاون ولادنا في القراية السوايع وخسيرلفلوس وهما ما فاهمين والو
المراة(2)..اجي ابنيتي
الخادمة..نعام الالة
المراة(2)..اجي لهنا
الخادمة (خائفة )نجي الالة
المراة(1)..زيدي تكلمي لالاك
المراة(2) لالة ولالاك بنت النبي قوليليا قريتي ابنيتي
الخادمة..ايه الالة
المراة..شحال هادي وانتي كاتخدمي في الديور
الخادمة..تلت شهور الالة
المراة(2)..وعلاش خرجتي من لقراية
الخادمة..حيث ما كاينش الكوليج نجحت في السادس جيت انا الاولى ولكن با جلسني حيث ما كاينش الكوليج
المراة(1)..هادشي كاعما كنت عارفاه الكوليج ما قدرش يديك ليه حيث بعيد او يديك تخدمي من الدوار للفيلاج قدراوا الله ينعل اللي ما يحشم
المراة(3)..كراه مسكين فقير
المراة(1)..لاش يولد
المراة(2)..سبحان مبدل الاحوال دركة شوية عاد كنتي باغا تاكليها ودابا كاتجي عليها
المراة(1) الله ينعل الشيطان سيدي ربي ما يرضاش بالظلم انا واخا كانعايرها حنينة عليها وراني عاضاسرا شوية ولكن الحق ما نبغيهش ايضيع
المراة(3) شحال باش خرجتي من المدرسة
الخادمة ..هاد العام
المراة(2)..علاش ما داوكش لدار الطالبات راها بحال داركم
المراة(1) علاه تبنات في الدوار شي دار الطالبة
المراة(3)..الله اكبر على مرت القايد ماعارفا اش كيجرى في المنطقة
المراة(1) مال مرات القايد كتسني في الضواصا هاد الدار راها ماشي عندنا هنا في الفيلاج راها بعيدة قوليليا بنتي تبغي ترجعي للقراية
المراة(2)..ايه راه دارت دار الطالبات باش تحارب الهدر المدرسي
المراة(1)..او يبغيو يرجعوها تقرا
المراة(3)ايه وعلاش لا ياك يلاه تلت شهر باش خدمة عندك اوا الالة او الدراري يلاه دخلو بهادي شهر اونص تقيد وتجتهد باش توصل على لخراين وان شاء الله تتوفق
المرأة(1) اشقلتي ابنيتي تمشي
الخادمة..ايه الالة ولكن واش ا با يبغي
المرأة(1)..غادي يبغي بززمنو
( الطفلات يجرين ويعانقن الخادمة ويباركن لها)
( النسوة يراقبن الحدث في حبور)الجمهور يصفق )
انتهى..

ibrahim nekroumi
مدير عام


عدد المساهمات: 39
تاريخ التسجيل: 04/02/2015
العمر: 13